الليدى لواحظ

من طرف ساسو السبت 31 يوليو - 4:07

ازيكم
يا احلى شباب وبنات
جبتلكم قصة تموت من الضحك
بطلتها لواحظ
المفترية شويتي

الحلقة الاولى

الام:لووووووووووى
لووووووووووووى

الاب:ايه يا جملات بتزغرطى كده ليه؟

الام:اسكت
يا حج لواحظ جالها عريس يا اخويا

الابوعنيه مبرأة ومذهول)
لواحظ بنتنا يا ولية ولا انا بيتهيألى!!!!يا اما أنتا كريم يارب أخيرا
هتتفك عقدتها
الام:وطى صوتك يا متولى البت تسمع تتقهر يا أخويا احنا ما
صدقنا

الاب:طيب طيب خلاص بس تعالى احكيلى مين اللى امه داعية
عليه ده

الاموهى فى منتهى الانشراح) ده الواد عبد المتجلى ابن الست
بهية فى الشارع اللى ورانا يوه ما انتا عارفهم يا راجل كان ابوه بتاع
مراجيح

الاب:ها كملى.... اولها مراجيح ربنا يستر

الام:هو
عمره ما شاف لواحظ بس سمع عن ادبها وجمالها اصله كان مسافر الخليج يا اخويا

الاب:أدبها
طب قولى حاجة غير كده يا ولية ما انتى عارفة بنتك لسانها طول نفق شبرا

الام:يوه
بقى يا متولى سيبنى اكمل يا راجل وما تبوظش فرحتى

الاب:يعنى
بيشتغل ايه حيلة امه ؟

الام:بسم الله ماشاء الله ميكانيكى اد
الدنيا

الاب:يلا لو زبال حتى انا عاوز اجوزها قبل ما أتشل
وتجيلى جلطة من عمايلها السودا

الام:بعد الشر عليك يا ابو
لواحظ....وتعيش وتشوف ولاد ولادها

الاب:لالالالا هى بس تتجوز ومش
عاوز اشوف اى حاجة من ريحتها ده انا جالى الضغط والسكر منها يا جملات

الام:ههههه
تتك أيه يا متولى ضحكتنى ده انتا بتموت فيها يا راجل مش بنتك الكبيرة

الاب:امال
ايه ....بس ربنا يهديها وتتم الجوازة على خير

(صوت تكسير
وصريخ ابنهم الصغير حناطة خارج بيجرى من اوضته )

حناطة:أاااااااااااااه
الحقونى يالهووووووووووى

(ويستخبى حناطة ورا كرسى أبوه
.....بينما تخرج الليدى لواحظ بتجرى وراه وهى بنت شرسة رغم ملامحها التى
تبدو الى حد كبير مقبولة ولكنها غير منظمة فى مظهرها وعنيفة وصوتها عالى
باستمرار)

لواحظ:وحياة أمك وأبوك اللى رايح تستخبى وراه ده
لقطعك ياخرتيت انتا.....مااااااااااشى اما كهربتك يا حناطة وانتا نايم
وتموت مفحم ما أبقاش أنا فتكات

الاب بمنتهى الهدوء والرعب
طبعا من منظر بنته وفلذة كبده لواحظ) ايه يا لظلظ صلى على النبى فى قلبك
كده يا بنتى فى ايه بس؟

لواحظ :اسكت انتا دلوقتى يا عم الحج
سيبنى منى له

الاب:عم الحج!!!! يا بت احترمينى الله يحرقك
ده انا ابوكى

كان يوم اسود يوم ما أمك قالتلى انها حامل
فيكى
الام:اة يا اخويا حتى يومها المرحومة أمك ربنا افتكرها اهى البت
طلعت لها

لواحظ:يا عينى عليكى يا لولو كلهم عليكى الهى
اشوف فيكو يوم

الاب:يلا يا حناطة على اوضتك ماتخفش
....(ويلتفت الاب للواحظ) وانتى يا أم طويلة أترزعى جمبى هنا عايزك

لواحظ
تقعد على الكرسى فى انكسار وهزيمة بعد ما حناطة فلت من تحت سنانها) افندم
يا بابا
الاب:ايه الادب ده كله .....الله الله

الام:خلاص
بقى يا متولى يلا فرحها بالخبر (وتطبطب على لواحظ وعلى وشها ابتسامة
عريضة)

الاب:احممممم بصى يا لواحظ يابنتى خالتك حسنية جايبة
لك عريس لوقطة وهيجوا يشوفوكى الخميس الجاى

الام:لووووووى
مبروك يا نور عينى عقبال الفرح يارب(وتبوس لواحظ التى جلست فاتحة بؤها
ومذبهلة من خبر زيارة عريس الغفلة)

الاب:هو اسمه عبد
المتجلى وبيشتغل ميكانيكى محترم .......ها ايه رأيك .؟

لواحظ:ايييييييييييه
ميكانيكى يعنى ايده سودا وريحته بنزين 80....مستحيل اتجوزه مش عايزاه

الاب:هتشوفيه
غصبن عن عين ابوكى .....هو ده اللى عندى واعملى حسابك على الخميس اللى جاى

لواحظوعنيها
بتطق شرار وتحدى) بقى كده ماشى

انتا اللى جبته لنفسك يا سى
عبد المتجلى ..........

لسة الخطوبة وربنا معاك يا عبده
اتمنى
تعجبكم يا جماعة
والكل معزوم فى الخطوبة
والحاضر يعلن الغايب
خطوبة
لواحووووووووووووووووواحظ قريبا
الحلقــــــة التانيـ.ــة

(من
يوم ما الست ام لواحظ عرفت بمعاد الخطوبة والبيت بقى فى حالة طوارىء خبط
ورزع وتنفيض ويوم الخميس البيت بقى ولا بيت المحافظ وجاهز لاستقبال الفارس
الهمام عبد المتجلى )

اوضة لواحظ.......لوووووووووووى
لووووووووى وبنات العيلة بيغنوا ماتزوقينى ياماما قوام ياماما ده عبد متجلى
بره وجايب الشكمان ياماما

لواحظ اوووووووف عيال رخمة
ربنا ياخدهم )وعشرة واقفين يزوقوا فيها وهى ضربة الوش الخشب ومش طايقة دبان
وشها

فى نفس الوقت كان عبد المتجلى والست والدته طالعين
على السلم وماسك ايد والدته الست بهية
الست بهية:بشويش يا بنى مفاصلى
بتنقح عليا

عبد المتجلى:يلا بقى يا أما عاوز اشوف لواحظ
(كان
الاستاذ برعى جار والد لواحظ نازل بالصدفة وبص لعبد المتجلى بحسرة
وقاله:ان لله وانا اليه راجعون مبروك يا عريس ربنا يتولاك برحمته يا بنى

الست
بهية:وشوشت عبده وقالتله سيبك منه ده شكله مجنون الراجل ده شوف شعره منكوش
ازاى ومتعور

عبد المتجلى :الراجل ده خضنى هو يقصد ايه

الست
بهية :كل خير يا ضنايا ماتخفش

عبد المتجلى ظبط القميص ورفع
البنطلون ومسك علبة الجاتوه اللوكس اللى جايبهامعاه وضرب جرس الباب (غلطة
عمرك يا عبده)

الست بهية:تبصله وتضحك اسم الله عليك يا
حبيبى شبه المرحوم ابوك الخالق الناطق فينك يا شلبى تشوف ابنك وهو بيخطب

الامتفتح
الباب وفرحانة على الاخر)اهلا اهلا اتفضلوا

الاب:اهلا
وسهلا اتفضلوا ويسلم على عبده ويدخلهم الصالون

الامدخلت عند
لواحظ الاوضة)يلا يا حبيبتى عريسك وصل هاتى العصير وتعالى بشويش وافردى
بوزك شوية

لواحظ :الهى كان وقع من على السلم هو وامه وجالهم
ارتجاج وريحونا بقى

الام:عيب يا بت ده الواد فلقة قمر يا
خيبة وطول بعرض وشنبه يقف عليه الصقر

لواحظ :صقر لما يخرم
نفوخه وكمان بشنب يادى القرف عاملى فيها الملك فاروق

الام:يلا
بطلى طولة لسان وشهلى اخرجى بطل ما ابوكى يتنقط منك كفاية اللى طفشتيهم
قبل كده بعاميلك السودا

(ام لواحظ تسبقها على الصالون وترحب
بالضيوف )
الام:اهلا اهلا منورة يا ست بهية

ست
بهية:بنورك يا ام لواحظ

(عبد المتجلى مكسوف وعامل عريس ووشه
جايب الوان الطيف)

الابهو الواد ده اخرس ولا ايه)وقام رزعه
بايده على كتفه منور يا اسطى عبده

عبد المتجلى:الله
يخليك يا عمى

الابالواد مؤدب واخلاق والله خسارة فى المدفع
الرشاش اللى هيهل علينا دلوقتى)( هههههههههههههه عسل الراجل ده )

ست
بهية:أمال فين ست العرايس؟

الام:جاية حالا يا حبيبتى(يا
لواحظ تعالى سلمى على الضيوف)

(تدخل لواحظ وماسكة
صينية العصير وعاملة فيها نسمة وسى عبد المتجلى رافع نص عينه وبيبص على
فتاة احلامه اللى هتقلبهاله كوابيس باذن الله)

لواحظ :سلام
عليكم (وقعدت من غير ما تقدم العصير
وامها قاعدة تبصلها عشان تتحرك
وتقدمه ولا حياة لمن تنادى)

الست يا عينى قامت وقدمته
ودارت الموقف بس كان هاين عليها تقعد على لواحظ تبططها من كتر غيظها وهى
موصياها تقدم لحماتها الاول وبعدين العريس

الاب:سلمى
على خالتك ام عبد المتجلى يا لوزة
لواحظ الهى يسلم عليها قطر هى
والمحروس ابنها واخلص منهم) أزيك يا طنط وبتضحك ضحكة صفرا طبعا

ست
بهية:الله يسلمك يا مرات ابنى يا غالية
ايه رأيك فى عروستك يا عبودى

عبد
المتجلى:ماصدق طبعا وبص للواحظ وهى مودية وشها الناحية التانية ومش طيقة
تبصله وقال ماشاء الله يا امى

لواحظ الله ياخدك انتا وامك
يا شيخ)

ست بهية: ها يا حج متولى طلباتك انتو تأمروا

الاب:الامر
لله يا ست بهية احنا بنشترى راجل

(الاستاذ متولى والست
بهية وعبد المتجلى مركزين فى تفاصيل الجواز لواحظ قاعدة مخنوقة وحالفة
تطفشهم)

لواحظ :بصت لعبد المتجلى لاول مرة من اول
القاعدة (ايه ده يخرب بيت سنينك ده طلع قمر )
ونزلت عينها وبعد تفكير
عميق قررت تدى عبد المتجلى فرصة أما لاقته امور كده

الاب:ها
يا لواحظ ايه رأيك يابنتى نقرا الفتحة(وهو حاطط ايده على قلبه خايف تعمل
اى مصيبة زى عوايدها)

لواحظ :اللى تشوفه يا بابا (يلا
مع ان شنبه بيفكرنى بهولاكو زعيم التتار)

ست بهية:مبروك يا
ولاد وقروا الفاتحة
(لوووووووووى لوووووووووى)وام عبد المتجلى قعدت
تعيط

ست بهية:اهىءاهىءاهىءاهىء فينك يا ابو عبده تفرح معانا

لواحظ الولية النكد دى مش هتنفع معايا)اجيبلها سى
السيد بتاعها ده منين دلوقتى

عبد المتجلى:روقى بقى يا حجة
زمانه حاسس بينا دلوقتى

لواحظ زمانه مرتاح من امك النكدية
دى والله)
(معلش يا جماعة اصل لواحظ مش نكدية خااااااااااااااااالص
وهتشوفوا بعدين )

الاب:يلا بقى يا جماعة الغدا جاهز
وخلونا نفرح بقى بخطوبة الولاد

(وبعد الغدا مشى عبد
المتجلى ووالدته وهو فى منتهى الانشكاح ما هو مش عارف اللى هيجراله ولو عرف
هيتمنى يروح هو لابوه شلبى بتاع المراجيح)

(اوعوا تنسوا
انتو معزومين على الشبكة وربنا يهنى لواحظ بعبد المتجلى)

مشكورة ع القصه

بانتظار جديدك [ندعوك للتسجيل في المنتدى أو التعريف بنفسك لمعاينة هذه الصورة]

الليدى لواحظ

الليدى لواحظ

رد: الليدى لواحظ